媽媽教落

我屋企係一個講錢嘅地方。

媽媽話「以前斗零可以食碗白粥，或者買支孖條，有錢仔先會用五毫子食碗雲吞麵」。我心諗五毫子淨係買到包紫菜。唔明點樣買到雲吞麵。唔知斗零係乜，不過買到兩條雪條睇怕唔少錢。

細個跟阿嫲飲茶，可以喺紅色嘅散子兜拎三蚊，報紙檔抽獎一蚊，唧唧冰一蚊，彈彈波都係一蚊。我六歲就係日光族。直到有日媽媽話：「你憑咩每日拎阿嫲三蚊？」驚到震。

去阿婆屋企打牌，我會數錢，一蚊左邊，兩蚊右邊，廿蚊紙擺底。打一二蚊，食糊都係2, 4, 8, 16, 32, 64，好似乘數又好似加數。「數四蚊黎啦衰仔。」冇咩惡意，因為係找錢畀人。

過年收利是除咗要講多謝，仲要記住個利是封，如果入面封咗一百蚊要上報。有時真係唔記得，「噉下年點封返大啲畀人呀？」

大咗有少少零用錢，記得小食部媽咪麵賣兩蚊，街邊拮串燒賣五蚊，朱古力新地六個半，麥樂雞餐十七個八，廿蚊紙找兩個二。不過喺超市買支水五蚊，仍然會畀人鬧，「樓下麵包鋪一支水先兩蚊」。

體育館平日非繁忙時間嘅羽毛球場係51蚊，繁忙時間就59蚊。「仲駛問？梗係打非繁忙時間啦。」

中學每個星期有120蚊飯錢，每日24蚊，杯麵7蚊，外賣粉麵由9蚊加到畢業嘅12蚊，好食嘅飯盒21蚊，食四日杯麵可以食餐壽司。「邊個教你計埋啲噉嘅數？」我望吓佢，佢又望吓我。

好一段時間我都覺得屋企聽落有啲市儈但又好似冇乜銅臭，好似殺敵三千，但又唔見血。兵不血刃啲friend。

大學嘅時候，我分享吓大學邊度18蚊就食得飽，或者等兩點半有下午茶其實都好抵。「你真係算死草」，轉頭又塞五百蚊落我銀包。

part time去做啲展覽，企成日有幾百蚊，輕鬆，係悶啲。「咁辛苦嘅工你都做？」噉我機會成本低丫嘛，「都唔知你講乜」。

我去咗留學之後，成日等超市減價，有半價過嘅野我都食過，鬼五馬六雜七雜八嘅野夾夾埋埋就一餐。「想食就買啦，鬼死咁孤寒。」小數怕長計呀。

我仲記低每日用咗幾多錢，幾年之後寫滿咗成本簿，媽媽話：「痴線仔。」後黎我再去留學，用咗excel，佢冇出聲。不過可能啲字太細佢都唔知係乜。

每次返香港去機場都轉車轉餐懵，但真係唔捨得搭幾百蚊車，「好心你夜媽媽就咪咁寒酸啦！」吓，噉又話？

買手信返屋企，有時睇漏價錢，「咁貴你都買？」一次半次啫，「有冇減價先？」有有有，打死都話有。屋企可以買貴嘅野，但唔可以冇減價。

訓練得耐，生活都變咗係數字嘅精密操作。最近幾年，睇住媽媽慳嗰幾蚊又行餐死，部ipad玩咗成十年都唔肯換，機場返屋企咁遠都唔肯搭的士，網購嫌要收運費，行兩轉超市先買齊啲野。「不如買支新嘅羽毛球拍比妳？」「手痛，打鬼咩！」

細個如果畀人鬧，通常係因為錢；大個如果畀人鬧，通常都係因為錢。

今年母親節未買禮物，想試吓唔好因為錢畀人鬧。

《迴響》幾錢話？六十蚊？ok喎……

2022年5月19日