家書

I finally got a one-way ticket to Hong Kong. I thank all the people I met in person or virtually over these five years, for their care, support, encouragement, and love.

八年兩個月二十二日又六個鐘頭，我終於拎住一張單程機票返香港。

我話我嘅離開總係帶住回望，每年講兩次之後我都懷疑係咪一個美麗嘅藉口。但咁多年過去，我日文講得好咗，英文都講得好咗，多咗兩個學位，而香港都變咗好多，好嘅壞嘅，唔想記起嘅，未敢忘記嘅，但我仍然真誠地用同一個藉口，反覆訴說我嘅回望。因而我知道我冇淨係掛住我所知道嘅好，都冇迴避我從未遇到嘅壞。或者因為一個地方唔識講野，唔識駁斥我嘅理由，只能默默承受我投射嘅所有情懷，我先有一往情深嘅假象。我唔知道我可以為呢個城市做啲咩，我只係任性地做咗我鍾意做嘅野，然後返黎敲敲門，帶住一身泥濘。我希望呢身泥濘，唔係負累，唔係添忙添亂，而係我熱好身，儲咗少少經驗值，可以落場踢返場波，贏幾個精彩畫面，或者輸喺歡呼聲之中。

我慶幸一生夠長，可以任性之後仍然有歸處；我都慶幸一生夠短，唔駛見證任何結局。長篇故事，但願每頁都有一個鏗鏘嘅字。

此致 香港