沙官
首先要多謝蔡校長邀請我返黎，喺呢度同大家分享幾句說話。
呢幾年，大家一定經歷左好多風風雨雨、耳熱心酸，恭喜大家終於行到黎呢度
完成左中學呢個里程碑，值得比啲掌聲自己
You’re great, you’ve made it
我希望大家可以暫時忘記頭先蔡校長對我既介紹，
不妨當我係個total stranger
我同大家最緊密既連繫
可能都只係坐過同一張櫈
聽過另一個total stranger既興奮分享
我想藉呢個機會講少少好personal，好細眉細眼既野，分享下我對沙官既記憶
唔係因為年紀大喇，要靠講舊史自娛
而係因為年紀夠大，足夠遠離可以冷靜回望
好多從前既小事，因為從無整理，我以為瑣碎，但當中有好多靈光，原來重要
－－－－－
- 中學既時候，我中意中文，但我對中文最大既記憶，除咗係上蔡校長既中文堂，就係上堂拎住本磚頭咁厚既字典，同另一個老師對峙，爭論究竟粵語係6聲定9聲。後黎我先知道，有啲字典用九聲標音，有啲用六調標音，係兩個系統。但當時答題「月亮」個月字係9聲而我寫6聲，扣我一分，我足足嬲咗成個月。
- 我中學既時候開始學日文，而我既日文，其實係英文堂同數學堂學既。我好多謝冇阻止我既老師，因為做左老師之後其實我知道無論同學喺課室入面做咩都好，老師都一定睇到。當時我自以為高明，其實係佢地開明。
- 中三揀科既時候，因為揀文科，成續唔需要特別好，所以最後一科chemistry 幾乎裸考，合格就算。
- 文學老師曾經語重心長噉同我講，你做野太慳皮、太經濟實惠，答題好蝕底，讀大學、出黎做野都唔理想。我警剔到而家，總係諗住點樣又慳皮又經濟實惠，又可以活得幾理想。
我一方面慶幸曾經堅執，堅執中帶點叛逆，一方面又慶幸學校、老師冇同我糾纏，容我任性。我帶住一啲棱角入黎，又帶住另一啲棱角離開。學校冇令我變得圓滑，反而令我既棱角不傷人。可能教育就係咁既一回事。我唔知，但我係感恩既。
－－－－－
我喺沙官有所得著，亦有所缺失。
- 我一直後悔冇加入羽毛球隊，因為我係個I人，好怕同人打交道，直到上年校友日返黎玩，第一次喺禮堂打羽毛球，覺得為時已晚。
- 我冇乜享受過陸運會、水運會，覺得呢啲大節日唔屬於我，每年兩日既空白時間總係令我沉思，我唔知點解事情與我無關，係我既問題，定係制度既錯。
- 初中幾年參加中文二人對誦，冇一年拎過獎，就連蔡校長帶領既嗰一年都係空手而回。當時真係覺得人生好虛無。
- 我中二既時候被罰寫過一封悔過書，因為班主任堂太嘈定點，我記得寫得好倔強，好似下戰書噉道歉，我自知理虧，但老師冇再追究。
- 我記得中一既時候班上有同學被欺凌，但人太細，正義感太薄弱。公義唔係遲到，係直情冇黎。事情不了了之，遺憾沒完沒了。
- 有一件事，我真係覺得好「遺憾」。應該係中二時候，有個徵文比賽叫做「成語串串串」，睇下300字（連標點）以內可以用到幾多個成語，我用到61個，即係淨係得56個字唔係成語，但最後都冇贏到。我好震驚，震驚到唔再相信制度，至今都係一個未解之謎。
好多呢啲小事，拎出黎講並唔風光，但遺憾好似應該誠實面對。我好肯定，呢啲回憶既碎片，全部都同你地無關，因為回憶本身就係個人的，獨一無二的。但無論記憶係好係壞，都值得記取，一切既遺忘都意味住失落了既生命，尤其係中學既時光，陪伴咗你如今既三分之一人生。
－－－－－
最後，因為我中意文學，又做語言既，有幾段文字想同大家分享，都算係對大家既寄語。
第一句係「念念不忘必有回響」
你可能喺電影《一代宗師》度聽過，其實佢有更早既出處，
係出自李叔同《晚清集》人生解讀，原文係比較精彩既：
「世界是個回音谷，念念不忘必有回響，你大聲喊唱，山谷雷鳴，音傳千里，一疊一疊，一浪一浪，彼岸世界都收到了。
凡事念念不忘，必有回響。因它在傳遞你心間的聲音，綿綿不絕，遂相印於心。」
好有詩意，最適合落魄既時候安慰自己。
如果你有睇《排球少年》，你可能知道「飛べ。」點解，飛べ，日文寫做飛字，命令型。
希望你地都能夠飛。麻煩你飛，求下你飛，冇野比呢件事更值得喺年輕既時候做。
但飛真正既困難係承擔，因為你將背負一切，飛真正既磨練係知其所止，因為你要決定歸處。
最後一句想分享既係我上年寫比我既大學畢業生既一句說話，
正確啲講應該係佢地啟發咗我，教識我對待年輕生命的態度，以致我相信
「不帶惡意的年輕生命永遠光輝，只是閃耀在白天未被人看見。」
相信自己，你做到既野永遠比你想像既多。
所以希望你地「念念不忘地飛，等待屬於你既回響，你地永遠光輝，只係大人未睇到。」
希望你記住一個陌生人既鼓勵，我唔識你你唔識我
我由衷為你地許願，因為我知道
一代人有一代人既挑戰同苦難，
我早你地少少開始，走過左好一些，仲有好多喺面前。
我相信就算係咁多位老師、家長，都有佢地既掙扎同辛酸，
但我地每個人都只係喺唔同既時區修行，有機會，互相攙扶一下，走遠啲，睇多啲。
崎嶇既路一個人行，好容易氣餒。
但崎嶇既路好多人一齊行，其實不過係一場大型既「秋季旅行」。
最後，掌聲，送比咁多位與你地同行既老師，同埋最重要既，你自己。
希望大家帶住中學回憶，慢慢細味，迎接新既挑戰，得閒返黎探下老師，好既回憶需要多多記取。
祝福你地。
2025年6月25日 沙官
主禮。