環環相扣

珍珠婚賀詞

大家好，
我係保良局莊啟程 2001－2002年度畢業生 李梓明，
25年前嘅我，一定唔會想像到，
25年後嘅我竟然企喺我小學嘅中文老師係黃漢玲黃主任面前，
祝賀佢同先生dickson 嘅珍珠婚。
幸甚與共，與有榮焉。

拿睇下黃主任中文教得幾好！

－－－－－

今日我帶咗幾張舊相，等大家了解下carmen 姐作為老師嘅一面。

2006 訓話，又有台型
2013 盆菜宴特登返黎，然後就踏上越黎越唔似老師既道路
2014 去佢屋企BBQ，又唱K又玩狗又開party，樂而忘返
2020 因為小學準備大裝修，感謝函
2022 唔知點解就去咗馬會食飯，大家去到都係「嘩」一聲
2023 遲來的謝師宴，其實係班主任施老師退休，黃主任，應該一半就半退休？算啦請埋啦噉 2024 係我同太太嘅木婚紀念，多謝捧場
2026，上個月買咗好多禮物比我個仔，同埋恰我個仔

但如果要講一件黃主任影響我最深既事，一定係佢5年班比既一份功課。
你記唔記得係咩？

「每日一字」：當時要每日抄5個唔識既中文生字，
我小學中意睇書，因為要做呢份功課，我好仔細去睇啲字，希望搵到唔識既字
因為睇武俠小說（古龍），好多古風既字都唔識，索性一日做7個，查晒字典，抄埋解釋，
如是者做咗一兩年
我而家諗返，我好多既中文應該都係嗰陣時學返黎。

畢業之後，由唔知幾時，黃主任變咗carmen 姐，搞雞蛋仔，每年去好多次旅行。
我亦因為留學而成日唔喺香港，
但好在畢業咁多年，每隅幾年都會搵到啲藉口見面，

而家諗返，其實黃主任真係好多事，永遠都要問你下一步做乜。
「揀科未，讀大學未，拍拖未，畢業未，搵工未，結婚未，生仔未」
如果佢唔係我小學老師，有時都想郁佢。

我尋晚回望返呢幾年同黃主任既message
覺得生命嘅交疊唔一定連貫，
但肯定環環相扣，
再微不足道既事，可能都會影響生命
佢又點會諗到求其比份功課，然後就培育咗一個會幫佢表演講野既學生呢？

我聽講黃主任搞珍珠婚，部分原因係因為黎咗我同太太既木婚。
我一聽就覺得岩呀，
if not now then when.

我望住咁多年黎，生命將咁多唔同既人推到我地面前，
但好多當時重要既人，漸漸失去蹤影
我就知道一切相遇都講緣份，一切相聚都係因為互相挽留

我同我太太一齊10年，我已經唔知點樣多謝佢。
而如今我要祝福一對結婚30年既夫婦，仲願意搞場大龍鳳招待大家
簡單就似係夏蟲不可語冰

但我相信婚姻既本質應該係愛情，而愛情既本質就係生命既交疊，同行裡有愛，相件相隨。
我唔知點樣表達對carmen 同 dickson 既祝福，
但因為佢地，我會提醒自己，生命要多記取，欣賞美好，全力去愛。
生命影響生命，往往不可察覺。

黃主任多謝你邀請我地黎，同埋比個機會我講野。
等你地金婚我再黎表演：）