EP02 - 陌生人未必真係好陌生

簡介

「陌生人」成日都有一種負面嘅聯想，但其實我地每日都會遇到好多陌生人，巴士司機、麵包鋪嘅收銀員、搭地鐵坐隔離嘅學生，等等。有啲陌生人好似特別陌生，又有啲好熟悉嘅人可以感覺好陌生，甚至同一個人喺唔同時候可以既陌生又唔陌生。「陌生」其實係一種點樣嘅概念？「陌生」條線應該點樣畫？

我地討論一篇比較舊嘅短文，睇下「陌生」嘅下位分類，最後我地提到「陌生可能黎自一種想像嘅落差」。

by 梓明、Kennedy

參考：

Simmel, Georg. 1908. “The stranger”, in Kurt Wolff’s collection of Simmel’s texts (The Sociology of Georg Simmel). Translated and edited by Kurt H. Wolff. New York: The Free Press, 1950.

後記

一開始朋友同我講「陌生人 as a claim」嘅時候唔係好明，傾完明白冇一種係客觀嘅陌生人：「陌生人」呢個概念唔係依附喺一個固定嘅人或者一種客觀嘅特質上面，「陌生」唔單止係一人一義，仲要係幾乎一個處境一個定義。熟悉嘅人隨時可以好陌生（如果喺酒吧撞到老師），陌生嘅人都可以一秒變得好熟悉（如果我地一齊悼念）。我地本身成為咗一個函數，take幾個input（處境，人，事情），然後output「陌生／不陌生／有幾陌生」。「陌生人 as a claim」係因為「陌生」幾乎已經係一種完全出於自身（經驗集合）嘅判決，所以「陌生」同其他好多特質（如好、壞）睇齊，單單一個「陌生」嘅label並未帶有有意義嘅訊息。由呢度開始先係討論「陌生」嘅起點，係點樣嘅expectation、點樣嘅處境先會衍生「陌生」，並且「陌生」點樣作為一個非常流動嘅概念存在，同埋點樣去理解「陌生」嘅程度。好多思考都好似無濟於事，但我覺得認真不是輸了，而是認真，世界才開始了。