EP04 - 標籤唔好得黎又好常見

簡介

生活上有好多標籤，我地明知標籤唔好但冇辦法完全避免。如果標籤嘅本質係分類，咁點解標籤總有非常唔好嘅含義？如果標籤無可避免，我地又有點樣活喺一個充滿標籤嘅世界？我地輕輕講咗兩本書嘅睇法，討論咗標籤嘅意思同埋標籤嘅不定性。我地提及咗好多唔同嘅標籤，有啲標籤甚至係帶有歧視成份，但既然呢啲都係生活入面會出現嘅標籤，無理由避而不談。

by 梓明、Kennedy

參考：

Lemert, Edwin M. 1951. Social pathology; A systematic approach to the theory of sociopathic behavior. New York: McGraw-Hill.

Becker, Howard. 1963. Outsiders: Studies in the sociology of deviance. Free Press Glencoe.

後記：

其實「標籤」本身可能都係一種標籤，所以我一開始諗嘅時候係想將「標籤」還原返做一種中性啲嘅字，Kenndy都有提到，就係「分類」。如果「標籤＝分類」咁其實係非常無可厚非。我嘅理解係隨住世界越黎越複雜，我地對世界嘅高速掌握往往都係黎自於（好嘅）分類，可以等我地好快咁知道外界嘅事物同自身係一種點樣嘅關係。如果「標籤」嘅本質係分類，咁個問題就係點樣嘅分類先會令分類成為「標籤」。我嘅諗法係「標籤＝分類＋負面評價」，因為「標籤」同一般客觀分類最大嘅分類似乎就係多咗一層主觀嘅判斷喺入面，至少我們唔會覺得「有機」、「成年人」、「管弦樂器」呢啲係一種標籤（一般情況下）。但咁樣嘅講法「標籤」又好似只係負面嘅形容詞，例如「歹毒」、「涼薄」，似乎仍然未係一般「標籤」嘅意思。所以可能係「標籤＝分類＋負面評價＋脫離實際關聯」，我覺得同現實脫勾好似係「標籤」之所以成為「標籤」嘅重點，「標籤」因而變得空洞、離開思考、以偏概全、忽略現實，乃至於陷入返自身嘅定義入面。

亂世中努力思索，希望做力所能及嘅事。