EP05 - 你講緊嘅係藉口、理由、定係excuse

簡介

如果你遲到，有人指責你，話「你做乜遲到」，喺呢個你需要解釋你嘅行為嘅時候，俾一個點樣嘅解釋先可以安撫到對方？如果話係因為遇到交通意外，呢個係藉口、理由、定係excuse？如果話係因為塞車，呢個又係藉口、理由、定係excuse？唔同嘅解釋其實展現咗我地對「責任何在」嘅潛在理解。

我地講吓呢幾種「解釋」嘅下位分類，討論 The power of excuses。

by 梓明、Tony

參考：

Sliwa, Pauline. 2019. The power of excuses. Philosophy & Public Affairs 47(1):37-71.

後記

唔講唔知「解釋」可以有好多下位分類，呢三樣野好似係有一種咁嘅關係：我地將一個解釋視為理由即刻表示冇人做錯，冇人有責任；視為藉口即係有人做錯並且有關嘅解釋唔足以免去責任；至於視為excuse即係有人做錯但有關嘅解釋可以減輕部分責任。一開始冇諗過藉口同excuse係咁唔同，以為係直接嘅中英翻譯，不過傾落就發覺都幾唔一樣，好多場合都唔可以互換。個別語言所形成嘅詞語真係可以好細膩。最後冇時間傾，但我覺得「苦衷」同埋「掩飾」（as in 解釋即係掩飾）都有好強烈嘅語言色彩，如果有minimal pairs 可以劃分晒呢啲字嘅用法就好（而我未諗到）。