EP10 - 你嘅信任係咪值得信任？

簡介

每一場信任都有佢自己產生嘅基礎，大至政府每日公佈嘅肺炎確診數字，小至你面前飲緊嘅樽裝水，都有佢地自己嘅信任鏈。當社會越黎越複雜，資訊越黎越泛濫，要仔細驗證我地所相信嘅每一件事情幾乎唔可能；同時要暫停我地對所有事情嘅信任亦都唔實際。洪流入面，我地對唔同事情所形成嘅信任究竟有幾值得我地自己信任？

by 梓明、Kennedy

參考：

Giddens, Anthony. 1991. The Consequences of Modernity. Polity Press.

後記

有啲時候，我地好清楚知道信任係一種選擇：信朋友、信師長、信一個陌生人，但似乎我地未必時刻意識到呢個選擇幾乎係每一刻每一秒都發生緊。搭車，要相信司機；買菜，要相信菜販（唔厄秤或者唔賣唔新鮮嘅菜）；行路，都要相信頭上嘅鋁窗唔會突然脫落；誇張啲，行步路都要相信下一秒條路唔會突然下陷。除咗兜口兜面見到嘅人，我地更多嘅信任可能投入咗喺一啲制度、或者一啲更為抽象嘅事情上面。將習以為常嘅相信抽返出黎講，唔一定係要懷疑晒成個世界，而係試吓有冇辦法重構返自己嘅信任鏈。就算唔得，知道唔得都總好過唔知得唔得。習以為常嘅事情可能係最陌生，尤其係我地唔知道或者唔記得咗點解呢啲事情存在，而又獲得我地嘅信任。